Urdu Poetry

**HAQ** Tue Aug 11, 2009 4:58 pm

HAQ: Admin; Mensajes : 5748
Fecha de inscripción : 2009-07-10
Edad : 41
Localización : Barcelona.

Post n°1

Urdu Poetry

HAQ Tue Aug 11, 2009 4:58 pm

Khouf-E-Dunia Se Meray Paas Na Aanay Walay
Jaan Rakhtay Hain Hatheli Pe Nibhanay Walay

Meri Ruswai Main Ghairon Ka Koi Dosh Nahi
Is Main Shamil Hain Meray Apne Chahnay Walay

Kitna Nadan Hoon is Aas Pe Zinda Hoon
Laut Aayen Ge Mujhe Chor Ke Janay Walay

Ab Kahon Tujh Ko Mein Mohsin Tou Bhala Kesay Kahon
Kar Kay Ehsaan Sar-E-Aam Jatanay Walay

Ab Tou Rasta Hai Na Manzil Hai Na Shanasa Hai Koi?
Shukriya Tera Mujh Ko is Mor Pay Laanay Walay_____________________________________________________________________

Mujhay Khud Say Hain Shikayatain Mujhay Zindagi Say Gila Nahi
Ke Jo Chaha Mein Nay Wo Paa Lia Nahi Aesa Kuch Jo Mila Nahi

Meray Aass Paas Hai Roshni Meray Raaston Main Chiragh Hain
Yeh Teray Karam Ka Hai Mojza Meri Justuju Ka Sila Nahi

Teri Aankh Say Jo Haseen Ho Wo Nigah Jag Main Bani Nahi
Teray Rukh Ko Jis Say Misaal Doon Koi Aesa Phool Khila Nahi

Ye Jo Teri Zulf Ka Hai Haashiya, Ye Jo Tera Chehra Hai Khush-Numa
Koi Raat Aesi Siyaah Nahi Kisi Subah Mein Yeh Jila Nahi

Ye Jo Mehr-O-Maah Ki Hain Halatain Ye Jo Aaiyenon Ki Hain Hairatain
Hain Azal Say Sab Yeh Isii Tarah Koi Apni Jaa Say Hila Nahi
_______________________________________________________________________

Patjhar Se Mein Chahat Ki Ada Maang Raha Hoon
Beydard Se Ehsaas-E-Wafa Maang Raha Hoon

Umeed-E-Karam Jis Se Nahi Dil Ne Lagayi
Kyun Apne Liye Us Ki Dua Maang Raha Hoon

Wo Kaisa Maseeha Tha Jisay Daikh Ke Sochoon
Bimaar Se Kyun Apni Shifa Maang Raha Hoon

Dewana-E-Duniya Tou Hai Khud Chaak Geraibaan
Wehshi Se Mein Kab Band-E-Qaba Maang Raha Hoon

Kab Meri Raza Teri Raza Se Rahi Barh Kar
Mein Teri Raza Main Tou Raza Maang Raha Hoon

Ye Sabar Tou Mauqoof Hai Bas Roz-E-Jaza Tak
Duniya Main Kahan Uski Jaza Maang Raha Hoon
_______________________________________________________________________

Teri Tasweer Meri Ankhon Main Basi Kyun Hai
Jidhar Dekhoon Bas Udhar Tu Hee Kyun Hai

Teri Yaadon Say Wabasta Meri Takdeer Hai Lekin
Tujhe Na Paa Kar Meri Takdeer Roothi Kyun Hai

Mujh Ko Hai Khabar Asaan Nahi Tujhe Haasil Karna
Phir Bhi Yeh Intizaar Yeh Bekarari Kyun Hai

Barson Guzar Gaye Meray Tanhayee Main Lekin
Meri Baanhon Ko Aaj Bhi Tera Intizaar Kyun Hai

Teri Chahat Ki Kasam Khoon Kay Aansoo Roya Hoon
Ab Nahi Hai Kuch Baqi Phir Ye Jaan Baqi Kyun Hai

Khatam Huwa Mera Yeh Afsana Ek Baat Bata Do Lekin
Anjaam Tha Maloom Mujh Ko Phir Ye Muhabbat Kyun Hai
_________________________________________________________________________

Hum Yusuf-E-Zamaan Thay, Abhi Kal Ki Baat Hai
Tum Hum Pe Meherbaan Thay, Abhi Kal Ki Baat Hai

Wo Din Bhi Thay Ke Hum Hee Tumhari Zaban Pe Thay
Mozu-E-Dastaan Thay, Abhi Kal Ki Baat Hai

Aey Karwaan-E-Inqilaab-0-Gul ! Tum Ko Yaad Ho
Hum Meer-E-Karwaan Thay, Abhi Kal Ki Baat Hai

Jin Doston Ki Kami Hai Aaj Hayaat Main
Wo Apnay Darmeyaan Thay, Abhi Kal Ki Baat Hai

Kuch Haadson Se Gir Gaye Hum Zameen Par
Hum Rashk-E-Aasmaan Thay, Abhi Kal Ki Baat Hai_________________________________________________________________________

Aankhon Se Meray Is Liye Laali Nahi Jati
Yaadon Se Koi Raat Jo Khaali Nahi Jati

Ab Umar Na Mausam Na Wo Rastay Ke Wo Paltay
Is Dil Ki Magar Khaam Khayaali Nahi Jati

Maloom Hamain Bhi Hain Bohot Se Teray Qissay
Par Baat Teri Hum Se Uchaali Nahi Jati

Hamraah Teray Phool Khilati Thi Jo Dil Main
Ab Shaam Wo Dard Se Khaali Nahi Jati

Hum Jaan Se Jayen Ge Tabhi Baat Banay Gee
Tum Se Tou Koi Raah Nikaali Nahi Jati_________________________________________________________________________

Falsafay Ishq Main Paish Aaye Sawalon Ki Tarha
Hum Pareshan Hi Rahay Apnay Khayalon Ki Tarha

Sheeshagar Bethay Rahay, Zikr-E-Maseeha Le Kar
Aur Hum Toot Gaye Kaanch Ke Pyaalon Ki Tarha

Jab Bhi Anjaam-E-Mohabbat Ne Pukara Khud Ko
Waqt Ne Paish Kiya Hum Ko Misaalon Ki Tarha

Zikr Jab Hoga Mohabbat Main Tabahee Ka Kabhi
Yaad Hum Aayen Gey Duniya Ko Hawaalon Ki Tarha
_________________________________________________________________________

Galiyon Se Meri Tum Ne Guzar Kar Nahi Dekha
Gham Ye Hai Ke Khushiyon Ne Mera Ghar Nahi Dekha

Mehroom Hai Wo Pyar Ki Daulat Se Abhi Tak
Dil Jis Ne Kaheen Apna Laga Kar Nahi Dekha

Gumnaam Hai Wo Phool Gulistan-E-Jahan Main
Dulhan Ki Tarah Jis Ne Sanwar Kar Nahi Dekha

Ye Sach Hai Mera Qatl Sar-E-Aaam Hua Hai
Kis Ka Tha Meri Peeth Pe Khanjar Nahi Dekha

Dil Cheer Ke Niklay Tou Hain Ashaar Ye Meray
Afsos inhain Aap Ne Parh Kar Nahi Dekha_________________________________________________________________________

Teri Aankhon Main Meray Dil Ka Naqsha Ho Bhi Sakta Hai
Jisay Dewaar Samjha Hai Woh, Rasta Ho Bhi Sakta Hai

Nazar Se Durr Reh Kar Bhi Kisi Ki Soch Main Rehna
Kisi Kay Paas Rehney Ka Tareeqa Ho Bhi Sakta Hai

Wo Apni Sard Mehri Se Mujhay Had Main Tou Rakhta Hai
Mera Had Sey Guzarnay Ka Irada Ho Bhi Sakta Hai

Bhari Duniya Ka Maila Saath Ho Tou Kaun Si Mushkil
Magar Ek Shakhs Mailay Main Akaila Ho Bhi Sakta Hai

Yeh Seedhi Raah Par Chalna Kahan Se Seekh Aaye Ho?
Yeh Rasta Dosti Ka Hai Yeh Tairha Ho Bhi Sakta Hai

Machalta Thokrain Khata Hua Paani Ka Ek Dhaara
Teray Dil Tak Pohonchnay Ka Bahana Ho Bhi Sakta Hai

Nikal Kar Band Kamray Sey Zara Baazar Main Aao
Agar Tum Daikhna Chaho Tamasha Ho Bhi Sakta Hai
___________________________________________________________________________

Wo Shakhs Mujh Ko Jeet Ke Hara Hai Aur Bas
Itna Hee Zindagi Ka Khasara Hai Aur Bas

Kaisay Kahoon Ke Us Ka Irada Badal Gaya
Sach Tou Yahi Hai Us Ne Pukara Hai Aur Bas

Duniya Ko Is Main Dard Ki Shiddat Kahan Milay
AankhoN Say Aik Toot’ta Hua Taara Hai Aur Bas

Lafzon Main Dard-E-Hijr Ko Mehsoos Kar Ke Dekh
Kehnay Ko Main Nay Waqt Guzara Hai Aur Bas

Ab In Main Koi Khwab Sajanay Nahi Mujhay
Aankhon Ko Intazar Tumhara Hai Aur Bas

Mein Ne Kaha Ke Khwab Main Dekhi Hain Barishain
Uss Nay Kaha Kay Aik Isharaa Hai Aur Bas
__________________________________________________________________________

Silsilay Jo Wafa Kay Rakhtay Hain
Hoslay Inteha Kay Rakhtay Hain

Hum Kabhi Bad-Duwa Nahi Detay
Hum Salikay Dua Kay Rakhtay Hain

Un Kyy Daaman Bhi Jaltay Dekhay Hain
Wo Jo Daaman Bacha Kay Rakhtay Hain

Hum Nahi Hain Shikast Kay Qaail
Hum Safinay Jala Kay Rakhtay Hain

Jis Ko Jaana Hay Wo Chala Jaaye
Hum Diye Sab Bujha Kay Rakhtay Hain

Hum Bhi Kitnay Ajeeb Hain Aey! Dost
Dard Ko Dil Bana Kay Rakhtay Hain___________________________________________________________

Pyar Kartay Hain Magar Shart-E-Wafa Rakhtay Hain
Log Kaisay Hain Ke Khud Hee Se Reya Rakhtay Hain

Aaj Dastoor-E-Mohabbat KI Ada Tou Dekho
Wo Talabgaar-E-Wafa Hain Jo Jafa Rakhtay Hain

Hum Ko Dhoka Hee Mila Dost Kaha Hai Jis Ko
Dil Main Par Shamma-E-Umeed Jala Rakhtay Hain

Kya Talab Hogi Jahan Bhar Ke Khazanon Ki Ke Hum
Jee Main Posheeda Jahaano Ka Khuda Rakhtay Hain

Jin Ka Har Lafz Hai Khanjar Tou Nazar Atishi Teer
Hum Faqat Un Ke Liye Harf-E-Dua Rakhtay Hain

Sochtay Hain Ke Bas Ab Dil Ka Sabhi Haal Kahain
Har Mulaqat Main Par Saath Haya Rakhtay Hain

Wo Phir Acha Bura Duniya Se Sila Kya Maangain
Shamil Har Kaam Main Jo Us Ki Raza Rakhtay Hain
___________________________________________________________

Mujhe Kitnay Hee Barson Se Agarchay Janta Hai Wo
Yeh Kaisa Zulm Hai Kay Ajnabi Gardaanta Hai Wo

Meray Hathon Ne Jis Ko Chand Jaisa Roop Bakhsha Tha
Mujhay Taareek Lamhon Main Kahan Pehchanta Hai Wo

Main Usay Apna Bananay Ke Gumaan Main Hoon
Mujhe Maloom Hai Ke Kab Kisi Ki Maanta Hai Wo

Sahara Maangta Hai Sirf Tanhaai Ke Lamhon Main
Muhabbat Ka Taluq Kab Kisi Se Baandhta Hai Wo

Mein is Duniya Ke Har Ek Jabr Ko Phir Bhool Jata Hoon
Jab Apnay Qurb Se Meray Badan Ko Dhaanpta Hai Wo

Mera Dil Chahata Hai Us Ko Seenay Se Laga Loon Mein
Ridaa-E-Gham Ko Jab Bhi Apni Rooh Pe Taanta Hai Wo

Mujhe Jab Dukh Milain Tou Kis Qadar Khushiyaan Manata Hai
Chalo Jana Kisi Tarah Tou Mujh Ko Jaanta Hai Wo
____________________________________________________________

Guzar Rahay Hain Jo Mujh Pe Azaab, Us Kay Hain
Ke Meri Chashm-E-Tamanna Main Khwaab Us Kay Hain

Mein Zakhm Zakhm Hoon Mera Naseeb Hain Kantay
Woh Rang Rang Hai, Saaray Gulaab Us Kay Hain

Kitaab Meri, Qalam Mera, Soch Bhi Meri
Magar Jo Likhay Hain Mein Ne Wo Baab Us Kay Hain

Nahi Hai Meray Muqaddar Ka Aik Bhi Taara
Ye Kehkeshaan Ye Maah-0-Aab Us Kay Hain

Wisaal-0-Hijr Ka Mausam Usi Ka Mausam Hai
Sawaal Meray Hain Shayad Jawab Us Kay Hain

Woh Merii Zaat Ka Ek Mustanid Hawaala Hai
Kitaab-E-Ishq Kay Saaray Nisaab Us Kay Hain

Mein Hairaton Kay Samandar Main Gharq Hoon Ke
Tamaam Aks Sir-E-Sath-E-Aab Us Kay Hain_____________________________________________________________

Teri Yaad Vird-E-Zubaan Hui Tou Ajab Rang Dikha Gayee
Kabhi Ash Ankh Mai Agaye Kabhi Aah Dil Main Sama Gayee

Ye Jo Ek Shab Ka Hijaab Hai Isay Darmiyan Se Hata Kabhi
Kay Tulu-E-Subha Ki Arzoo Meri Kitni Neendain Ura Gayee

Meray Zoq-e-Sajda Ke Samnay Mera Koi Gham Na Teher Saka
Wohi Ek Lamhay Ki Haazri Meri Har Khalish Ko Mita Gayee

Meray Ghar Say Teray Ghar Tak Ye Wohi Sunehri Gulaab Thay
Jinhay Ansoon Ki Bahar-E-Nau Meray Rastay Mai Bicha Gayee

Teray Jalwa-E-Bemisal Say Meray Baam-0-Dar Bhi Laraz Gaye
Teri Ek Jumbish-E-Baysada Meray Jism-0-Jaan Ko Hila Gayee_________________________________________________________________

Duniya Se Mujhe Pyar Tha,Sab Bhool Chuka Hoon
Ek Shakhs Mera Yaar Tha,Sab Bhool Chuka Hoon

Woh Hijr Ki Raaton Kay Sulagtay Huay Lamhay
Aankhon Pe Koi Baar Tha,Sab Bhool Chuka Hoon

Haan Meri Khata Thi Kay Tujhay Toot Kay Chaha
Haan Mein Hee Gunehgaar Tha,Sab Bhool Chuka Hoon

Ab Gham Mujhay Deemak Ki Tarah Chaat Raha hai
Khushiyon Se Mein Sarshaar Tha Sab Bhool Chuka Hoon

Bakhshi Hai Mujhe Pyar Ke Badlay Main Judaai
Jo Bhi Tera Kirdaar Tha,Sab Bhool Chuka Hoon

Aankhain Shab-E-Furqat Main Raha Karti Theen Pur Nam
Mein Tera Talab Gaar Tha,Sab Bhool Chuka Hoon

Bas Itna Mujhe Yaad Hai Ek Wasl Ki Shab Thi
Iqraar Tha,Inkaar Tha,Sab Bhool Chuka Hoon

Ek Shakhs Nay Pagal Sa bana Rakha Hai Mujh Ko
Mein Kitna Samajh Daar Tha Sab Bhool Chuka Hoon____________________________________________________________________

Takleef-E-Hijr Dey Gai Hai Raahat Kabhi Kabhi
Badla Hai Yun Bhi Rang-E-Mohabbat Kabhi Kabhi

Dil Ne Teri Jafa Ko Saharaa Samajh Liya
Guzri Hai Yun Bhi Hum Pe Museebat Kabhi Kabhi

Duniya Samjh Na Lay Teray Gham Ki Nazakatain
Karta Hoon Zeray-Lab Jo Shikayat Kabhi Kabhi

Hai Jis Taraf Nigaah Tawajja Udhar Nahi
Hoti Hai Berukhi Bhi Inaayat Kabhi Kabhi___________________________________________________________________

Is Dil Ne Tere Baad Mohabbat Bhi Nahi Ki
Had Ye Ke Dharaknay Ki Jisaarat Bhi Nahi Ki

Tabeer Ka Aeizaaz Hua Hai Usay Haasil
Jisne Meray Khuwabon Main Shiraakat Bhi Nahi Ki

Ulfat Tou Bari Baat Hai Humse Tou Sar-E-Shehar
Logon Nay Kabhi Dhang Sey Nafrat Bhi Nahi Ki

Aadaab-E-Safar Ab Wo Sikhaate Hain Jinhon Ne
Do Chaar Qadam Thay, Yeh Musaafat Bhi Nahi Ki

Kya Apni Safaayi Main Bayaan Detay Ke Humne
Na Karda Gunaahon Ki Wazaahat Bhi Nahi Ki

Khaamosh Tamashaayi Ki Maanind Sar-E-Bazm
So Zakham Sahay Dil Pe , Shikaayat Bhi Nahi ki

Is Ghar Ke Sabhi Log Mujhay Chornay Aaye
Dehleez Talak Us Ne Yeh Zehmat Bhi Nahi Ki

Usne Bhi Ghulamon Ki Safon Main Humein Rakha
Iss Dil Pe Kabhi Jis Ne Hakoomat Bhi Nahi Ki______________________________________________________________

Abhi Suraj Nahi Dooba Zara Sii Shaam Honay Do
Mein Khud Hee Laut Jaoonga Mujhay Nakaam Honay Do

Mujhay Badnaam Karnay Ke Bahanay Dhoondtay Ho Kyun?
Mein Khud Ho Jaoonga Badnaam Pehlay Naam Honay Do

Abhi Mujh Ko Nahi Karna Hai Aetaraf-E-Shikast
Mein Sab Tasleem Ker Loonga Ye Charcha Aam Honay Do

Meri Hasti Nahi Anmol Phir Bhi Bik Nahi Sakta
Wafaain Baich Lena Par Zara Neelam Honay Do

Naye Aaghaz Main Hi Hosla Kyun Tor Bethay Ho
Jeet Jao Gey Tum Sab, Zara Anjaam Honay Do______________________________________________________________

Khush Thay Kuch Aesey Teri Rafaqat Ke Shauq Main
Manzil Ganwa Dee Hum Ne Musaafat Ke Shauq Main

Nafrat Hee Pehray Daar Mili Har Makaam Par
Jis Dar Pe Hum Gaey Hain Mohabbat Ke Shauq Main

Hum Baargah-E-Ishq Main Maqbool Yoon Huey
Khud Se Bichar Gaey Teri Qurbat Ke Shauq Main

Lautay Hain Ab Tou Saath Hai Ranj-0-Alam Ki Bheer
Niklay Thay Ghar Say Ek Musarrat Kay Shauq Main

Apnay Chaman Se Raabta Bilkul Nahi Raha
Sehra Neelam Ho Gaey Daulat Ke Shauq Main

Daaman Main Hasraton Kay Siwa Kuch Nahi Raha
Aesey Lutay Hain Hum Teri Chahat Ke Shauq Main
_______________________________________________________________

Kisi Ki Aas Ban Kar Phir Usay Tanha Nahi Karna
Bhalay Kuch Bhi Paray Karna Magar Aesa Nahi Karna

Khabar Kya Kis Ghari Wo Raakh Kar Daalay Teray Sapne
Yoon Hee Jaltay Sharaaron Se Kabhi Khela Nahi Karna

Na Ho Aesa Ke Yaadain Rooh Ka Sartaan Ban Jayen
Kabhi Hadd Se Zyaada Tum Usay Socha Nahi Karna

Mohabat Maia Shikayat Ka Kahan Dastoor Hota Hai
Gila Kar Ke Mohabbat Ko Kabhi Ruswaa Nahi Karna

Wafayain Dar-Haqeeqat Bepanah Anmol Hoti Hain
Kabhi Apni Wafaaon Ka Sila Maanga Nahi Karna

Kahi Aesa Na Ho Wo Apni Manzil Ka Nishaan Kho De
Kisi Ka Saath Rastay Main Kabhi Chora Nahi Karna

**HAQ** Tue Aug 11, 2009 5:07 pm

HAQ

HAQ: Admin; Mensajes : 5748
Fecha de inscripción : 2009-07-10
Edad : 41
Localización : Barcelona.

Post n°2

Re: Urdu Poetry

HAQ Tue Aug 11, 2009 5:07 pm

Safar Tou Mein Nay Kia Tha
Warna Saaz-0-Samaan Us Ke Thay

Mein Tou Bas Raazdaar Tha Us Ka
Warna Saaray Raaz Us Ke Thay

Wo Darya Main Pyaasa Betha Tha
Jab Ke Samandar Tamaam Us Ke Thay

Wo Dhoop Main Betha Hai Chaon Denay Ko
Jab Ke Darakht Saaray Saaya Daar Us ke Thay

Yun Tou Ba-Zahir Logon Main Rizq Mein Ne Baanta Tha
Laikin Dar Parda Saaray Haath Us Ke Thay

Mein Nay Kamaal-E-Bulandi Par Ja Ke Ye Socha
Ye Tou Saaray Kamaal Sirf Us Ke Thay_________________________________________________________

Har Koi Dil Ki Hateli Pay Hai Sehra Rakhay
Kis Ko Sairaab Karay Kis Ko Wo Pyasa Rakhay

Umar Bhar Kon Nibhata Hai Taluq Itna
Aey Meri Jaan Ke Dushman Tujhe ALLAH Rakhay

Hum Ko Acha Nahi Lagta Koi Hum Naam Tera
Koi Tujh Sa Ho Tou Phir Naam Bhi Tujh Sa Rakhay

Dil Bhi Pagal Hai Ke Us Shakhs Se Wabasta Hai
Jo Kisi Aur Ka Honay De Na Apna Rakhay

Ye Qanaa'at Hai, Ataa'at Hai Ke Chahat Hai
Hum Tou Raazi Hai Wo Jis Haal Main Jaisa Rakhay_______________________________________________________

Pathar Tha Magar Baraf Ke Gaalon Ki Tarah Tha
Ek Shakhs Andheron Mein Ujalon Ki Tarah Tha

Khawabon Ki Tarah Tha Na Khiyalon Ki Tarah Tha
Woh ilm_E_Riyazi Kay Sawalon Ki Tarah Tha

Uljha Hua Aisa Keh Kabhee Sulajh Nahi Paya
Suljha Hua Aisa Keh Misalon Ki Tarah Tha

Wo Mil Tou Gaya Tha Magar Apna Hee Mukaddar
Shatranj Ki Uljhi Hui Chalon Ki Tarah Tha
_______________________________________________________

Kahan Mumkin Tha Mein Dil Sey "TERI" Yaadein Mita Deta
Bhala Kaisey Mein Jee Paata Agar "TUJH" Ko Bhula Deta

"TERI" Ruswai Ke Dar Sey Labon Ko Si Liya Warna,
"TERE"Shehar-E-Munafiq Ki Mein Buniyadain Hila Deta,

Kia Tarq-E-Wafa Us Ney Tou Hogi Us Ki Majboori,
Jisay Barson Dua Dee Thi Usay Kya Baddua Deta!

Khabar Hoti Agar Mujh Ko Nahi Hai "TU" Muqaddar Main,
Usi Lamhay Mein Haathon Ki Lakeeron Ko Mita Deta!________________________________________________________

Aankhon Main Baaqi Reh Gaye, Ab Teray Khad-o-Khaal Se
Lub Pe Hain Kuch Sawal Se, Dil Main Hain Kuch Malaal Se

Tu Jo Gaya To Yuun Laga, Tanha Hoon Kainaat Main
Raatain Thaki Thaki Meri, Din Bhi Meray Nidhaal Se

Itne Qareeb Hoon Teray, Rasta Na Wehem Ko Milay
So‘un Teray Hisaar Main, Jagoon Teray Jamal Se

Mujh Ko Hain Kaam Aur Bhi, Kuch To Karo Mera Khayal
Aatay Ho Jab Khayal Main, Jatay Nahi Khayal Se

Tujh Si Hasee‘n Ghazal Koi, Mujh Sa Ghazal Sara Koi
Dunia Main Ho Ager Kaheen, Waazeh Karo Misaal Se

Uss Se Gila Ay Dosto, Itna Sa Hai Ke Wo Mujhe
Samjha Nahi Hai Aaj Tak, Ghaafil Hai Meray Haal Se
________________________________________________________

Ek Chaand Tanha Khara Raha Meray Aasmaan Se Zara Paray
Mera Sath Sath Safar Main Tha Meri Manzilon Se Zara Paray

Teri Justuju Ke Hisaar Say, Teray Khawab Teraa Khayal Say
Main Wo Shakhs Tha Jo Khara Raha Teri Chahaton Se Zara Paray

Kabhi Dil Ki Baat Kahi Na Thi, Jo Kahi Wo Bhi Dabi Dabi
Meray Lafz Tou Pooray Tou Thay Mager Teri Sama'aton Se Zara Paray

Tu Chala Gaya Meray Dost Zara Dekh Murr Ke Tou Ek Nazar
Meri Kashtiyaan Hain Jali Hui Teray Saahilon Se Zara Paray
___________________________________________________________

Us Ke Honton Ka Tabbasum Rahay Qayem Ya Rab
Us Ke Jeevan Main Khushiyon Ka Basera Kar De

Tu Meri Karb Ki Raaton Ko Bhalay Khatam Na Kar
Us Ki Har Shaam Ke Aakh?r Main Sawera Kar De

Us Ke Dil Ke Kisi Konay Main Jaga De Mujh Ko
Us Ki Ankhon Ko Meray Sapnon Se Gehra Kar De

Yeh Meray Dil Ki Dua Hai Meray Maula Sun Le
Saari Duniya Se Chupa Kar Usay Mera Kar De____________________________________________________________

Jin Raahon Pe Aik Umar Teray Saath Raha Hoon
Kuch Roz Sey Wo Raastay Sunsaan Bohot Hain

Mil Jao Kabhi Laut Ke Phir Mein Aaoon Na Shayad
Kamzor Hoon Mein Raah Main Toofaan Bohot Hain

Aik Tum Hee Nahi Meri Judai Main Pareshan
Hum Bhi Tou Teri Chaah Main Veeraan Bohot Hain

Aik Tark-E-Wafa Pe Mein Usay Kaisay Bhula Doon
Mujh Par Abhi Us Shakhs Ke Ehsaan Bohot Hain

Bhar Ayen Na Aankhain Tou Mein Ek Baat Bataoon
Ab Tujh Sey Bichar Janay Kay Imkaan Bohot Hain
_____________________________________________________________

Dil par aise be Azaabon Ko Utartay Dekha,
Hum Ne Chup Chaap Usse Khud Se Bichartay Dekha,

US Ko Socha To Har Soch Mein Khushbu Utri,
Us Ko Likha To Har Lafz Mehektay Dekha,

Yaad Aa Jaye To Qaabu Nhi Rehta Dil Par,
Warna Duniya Ne B Hum Ko na Taraptay Dekha,

Teri Soorat Ko Faqat Aankh Nhi Tarsi Hy,
Raaston Ko B Teri Yaad Mein Rotay Dekha.!

Hum Muhabbat Ke liye Aaj B Dewaane Hain,
Ye Alag baat hy k tu ne nhi murr k dekha._________________________________________________________________

Apnay Saaye Se Bhi Ashkon Ko Chupa Kar Rona
Jab Bhi Rona Ho Charaaghon Ko Bujha Kar Rona

Haath Bhi Jaatay Huye Wo Tou Mila Kar Na Gaya
Mein Ne Chaaha Jisay Seenay Se Laga Kar Rona

Teray Deewanay Ka Kya Haal Kia Hai Gham Ne
Muskuratay Huye Logon Main Bhi Ja Kar Rona

Log Parh Letay Hain Chehray Pe Likhi Tehreerain
Kitna Dushwaar Hai Logon Se Chupa Kar Rona
____________________________________________________________________

Ehl-E-Duniya Se Mohabbat Nahi Maangi Mein Nay
Mar Gaya Phir Bhi Sahoolat Nahi Maangi Mein Nay

Sirf Chaaha Hai Teray Dil Ki Tammana Hona
Apnay Maalik Se Hukumat Nahi Maangi Mein Nay

Mera Haq Hai Kay Mujhay Toot Kar Chaaha Jaye
Is Liye Tujh Se Mohabbat Nahi Maangi Mein Nay

Teri Aankhon Main Umadtay Huay Ansu Kya Hain
Sirf Poocha Hai Wazahat Nahi Maangi Mein Nay

Tum Ana Zaad Tou Sach Much Kay Khuda Ban Bethay
Tum Se Tou Bheek Main Izzat Nahi Maangi Mein Nay

Kyun Mujh Say Khafa Hoti Hai Zaalim Duniya
Haq Maanga Hai Re'aayat Nahi Maangi Mein Nay_____________________________________________________________________

Jab Kabhi Chaahay Kiye Andheron Main Ujalay Us Ne
Kar Dia Ghar Mera Sholon Kay Hawalay Us Ne

Us Pe Khul Jati Meray Shauq Ki Shiddat Saari
Dekhay Hotay Jo Meray Paon Ke Chaalay Us Ne

Jis Ka Har Aaib Zamanay Se Chupaya Mein Ne
Meray Kissay Sar-E-Bazaar Uchalay Us Ne

Jab Usay Meri Mohabbat Pe Bharosa Hee Na Tha
Kyun Diye Logon Ko Meri Wafaon Ke Hawalay Us Ne

Ek Mera Haath Hee Na Thaama Us Ne Warna
Girtay Huye Kitnay Hee Sambhalay Us Ne______________________________________________________________________

Tumhain Mein Bhool Jaoonga Magar Waada Nahi Karta
Hamesha Muskuraoonga Magar Waada Nahi Karta

Tumhari Har Nishaani Ko Mein Darya Bard Kar Doonga
Tumharay Khat Jalaoonga Magar Waada Nahi Karta

Tumhara Ziker Hua Mehfil Main, Tou Khamosh Rehna Hai
Mein Khud Ko Aazmaoonga Magar Waada Nahi Karta

Tujhay Wapas Bulana Hai Na Daini Hai Sada Koi
Mein Yun Dil Ko Manaoonga Magar Waada Nahi Karta

Chalo Tum Se Ye Waada Hai Ke Dil Main Dard Hain Jitnay
Kisi Ko Na Sunanoonga Magar Waada Nahi Karta

Sitaaro Dard Ke Maaro Chalo Khuwabon Ki Duniya Main
Mein Bhi So Hee Jaoonga Magar Waada Nahi Karta

Chalo Tum Se Ye Waada Hai Koi Bhi Qeemati Moti
Na Aankhon Se Giraoonga Magar Waada Nahi Karta_____________________________________________________________________

Shab-E-Hijraan Ki Aziyat Ki Khabar Kis Ko Hai
Meri Gumnaam Mohabbat Ki Khabar Kis Ko Hai

Kis Ko Ehsaas Meray Shiddat-E-Jazbaat Ka Hai
Meray Halaat Meri Wehshat Ki Khabar Kis Ko Hai

Mein Nay Chup Chaap Mohabbat Ke Sitam Jhailay Hain
Meri Is Darja Sharafat Ki Khabar Kis Ko Hai

Kon Aye Ga Aey Dil Ab Tujh Ko Tasalli Dainay
Teri Udaas Tabiyat Ki Khabar Kis Ko Hai
______________________________________________________________________

Ujray Huay Logon Sey Guraizaan Na Hua Kar
Halaat Ki Qabron Ke Ye Katbay Bhi Parha Kar

Kia Janay Kyun Taiz Hawa Soch Main Gum Hai?
Khwabeeda Parindon Ko Darakhton Sey Ura Kar

Us Shakhs Ke Tum Sey Bhi Maraasim Tou Hongey
Woh Jhoot Na Bolay Ga Meray Saamnay Aaa Kar

Wo Dastakain Tou Dega Kahan, Aay Gham-E-Ehbaab!
Mein Nay Tou Kaha Tha Kay Meray Dil Main Raha Kar

Har Waqt Ka hasna Tujhay Barbaad Na Kar De
Tanhai Ke Lamhon Main Kabhi Ro Bhi Lia Kar

Wo Aaj Bhi Sadiyon Ki Musafat Pay Khara Hai
Dhoonda Tha Jisay Waqt Ki Diwaar Gira Kar!!!______________________________________________________________________

Mera Azm Tou Tha Buland Tar Isay Haadson Nay Mita Dia
Mein Musafaton Main Bikhar Gaya Mujhay Raaston Ney Ganwa Dia

Teray Saath Chalnay Ka Hosla Meri Himmaton Sey Guzar Gaya
Mein Tou Pehlay Hii Tha Shikasta-Paa Mujhay Aandhiyon Ney Gira Dia

Teray Chehray Par Bhi Tou Phool Thay Teri Aankhon Main Bhi Tou Rang Thay
Tu Ney Phool Bhii, Tu Ney Rang Bhi, Sabhi Aansoun Main Baha Dia

Na Mein Chaaon Hoon Na Mein Dhoop Hoon Shikastgii Ka Wo Roop Hoon
Mera Dil Gaya Meri Jaan Gai Mujhay Bijliyon Ney Jala Dia

Tu Ney Sau Sitam Bhi Diye Tou Kya Mein Ney Seh Liye Teray Naam Par
Teraay Zulm Ki Hai Yeh Inteha Tu Ney Dar Sey Apnay Uthaa Diya_______________________________________________________________________

Agar Ansu Baha Deta Tou Us Ke Paas Kya Rehta
Woh Mujh Ko Hosla Deta Tou Us Ke Paas Kya Rehta

Nishan Mujh Ko Nahi Milta Koi Us Tak Pohonchnay Ka
Mujhay Apna Pata Deta Tou Us Ke Paas Kya Rehta

Woh Us Main MEIN Tha Ke Jis Ke Dam Pe Woh Zinda Hai
Mein Us Ka Dil Dukha Deta Tou Us Ke Paas Kya Rehta

Musaafir Saaray Phool Le Ke Apni Raah Chal Detay
Shajar Tehni Jhuka Deta Tou Us Ke Paas Kya Rehta

Meri Yaadon Nay Hee Ab Tak Usay Abaad Rakha Hai
Woh Mujh Ko Bhi Bhula Deta Tou Us Ke Paas Kya Rehta
_______________________________________________________________________

Khamosh Chahton Ki Mehek Us Taraf Bhi Hai
Hai Meray Dil Main Kasak, Us Taraf Bhi Hai

Mein Bhi Beqaraar Usay Dekhnay Ko Hoon
Meri Deed Ka Shauk Us Taraf Bhi Hai

Izhar-E-Mohabbat Ko Tou Beqarar Hoon Mein
Par Qayamat Si Betaabi Us Taraf Bhi Hai

Wo Mera Nahi Phir Bhi Khuda Se Maangta Hoon Usay
Duaon Main Mera Naam Us Taraf Bhi Hai_______________________________________________________________________

Mauj-E-Toofan Se Larta Raha Mein Yahi Soch Kar,
Kay isi Bujhti Hui Shamma Say Kabhi Roshni Hogi

Magar afsos Bey Khauf Ho Kar Tor Dia Us Ne Mera Dil,
Woh Jaanti Thi Usay Is Jurm Ki Saza Nahi Hogi

Uski Yaadon Ne Bhar Dia Zakhmo Se Ye Jigar,
Ab Tou Lagta Hai Meri Har Saans Aakhri Hogi_____________________________________________________________________

TANHA REHNA SEEKH RAHA HUN
MARR K JEENA SEEKH RAHA HUN
CHAH K PANA SEEKH LIYA THA
PA K KHONA SEEKH RAHA HUN
HANSI KO ZAAD E RAH BANA KAR
KANCH PY CHALNA SEEEKH RAHA HUN
PHIRTAY PHIRTAY SEHRA SEHRA
PYAS KO PEENA SEEKH RAHA HUN
JEENAY Ke HAIN AJAB TAQAZAY
ZINDA REHNA SEEKH RAHA HUN
_____________________________________________________________________

Meray Dil Ki Hai Yahi Aarzu, Mujhay Tu Hee Bas Mila Karay
Yun Hee Chahay Mujh Ko Tu Umar Bhar, Na Shikayatain Na Gila Karay

Meri Chahatain Meri Khuwahishain Meri Zindagi Hai Bas Teray Liye
Meri Rab Se Yahi Dua Hai Bas, Tujhay Koi Na Mujh Se Juda Karay

Meray Khuwab Meray Ye Ratt Jagay Meri Neend Bhi Hai Teray Liye
Meri Zindagi Jo Bachi Hai Ab, Teray Naam Us Ko Khuda Karay

Mujhay Zindagi Se Gila Nahi Mujhay Tujh Se Bas Yahi Aas Hai
Mein Bhi Chahoon Tujh Ko Sada Yun Hee, Agar Tu Bhi Mujh Se Wafa Karay______________________________________________________________________

Phir Kisi Yaad Ne Shab Bhar Hai Jagaya Mujh Ko
Kya Saza Dee Hai Mohabbat Ne Khudaya Mujh Ko

Din Ko Aaram Hai Na Raat Ko Hai Chain Kabhi
Janay Kis Khaak Say Qudrat Ne Banaya Mujh Ko

Dukh Tou Ye Hai Ke Zamanay Main Milay Ghair Sabhi
Jo Mila Hai Woh Mila ban Kay Paraya Mujh Ko

Jab Koi Bhi Na Raha Kandha Meray Ronay Ko
Ghar Ki Deewaron Ne Seenay Say Lagaya Mujh Ko

Youn Tou Umeed-E-Wafa Tum Say Nahi Hai Koi
Phir Charaghon Ki Tarah Kis Nay Jalaya Mujh Ko

Woh Diya Hoon Jo Mohabbat Nay Jalaya Tha Kabhi
Gham Ki Aandhi Nay Sar-E-Sham Bujhaya Mujh Ko

Bewafa Zindagi Nay Jab Chor Diya Hai Tanha
Maut Ne Pyar Se Pehlu Main Bithaya Mujh Ko_____________________________________________________________________

Ishq Main Ghairat-E-Jazbaat Ne Ronay Na Dia
Warna Kya Baat Hai, Kis Baat Ne Ronay Na Dia

Aap Kehtay Hain Ke Ronay Se Na Badlain Gey Naseeb
Umar Bhar Aap Ki is Baat Nay Ronay Na Dia

Ronay Waalon Se Kaho Un Ka Bhi Rona Ro Lain
Jin Ko Majboori-E-Haalaat Nay Ronay Na Dia

Tujh Se Mil Kar Hamain Rona Tha Bohot
Tangi-E-Waqt-E-Mulaaqaat Ne Ronay Na Dia

Aik Do Roz Ka Sadma Ho Tou Ro Lain Hum Bhi
Ham Ko Har Roz Kay Sadmaat Ne Ronay Na Dia

**Tani** Tue Aug 11, 2009 11:04 pm

Tani

Tani: Mensajes : 2023
Fecha de inscripción : 2009-07-12

Post n°3

Re: Urdu Poetry

Tani Tue Aug 11, 2009 11:04 pm

NICE POETRY HAQ THNKS FOR SHEARING
Smile

Last edited by Tani on Tue Aug 11, 2009 11:13 pm; edited 1 time in total

**Tani** Tue Aug 11, 2009 11:07 pm

Tani

Tani: Mensajes : 2023
Fecha de inscripción : 2009-07-12

Post n°4

Re: Urdu Poetry

Tani Tue Aug 11, 2009 11:07 pm

Main Nay Pucha Wafa se
Kyun Milti Hai Bewafai Pyar Mein
Wafa Nay Kaha Bewafa Jo Milte Hain Wafa Ki Aarr Mein!

Aankhon Se Pucha Q Behti Ho Kisi Kay Intezar Me?
Tu Aankhon Nay Kaha Bus Kisi Ko Dekhna Ki Aas Me!

Dil Se Pucha Kyun Tarapta Hai Kisi Ki Yaad Me?
Tu Dil Nay Kaha Toot Chuka Hoon Kisi Ka Pyar Me.............

**Tani** Tue Aug 11, 2009 11:12 pm

Tani

Tani: Mensajes : 2023
Fecha de inscripción : 2009-07-12

Post n°5

Re: Urdu Poetry

Tani Tue Aug 11, 2009 11:12 pm

KOI EHD BHI US KO YAD NAHI,
KOI BAAT BHI US KO YAD NAHI,
EK SHAKHS NE US KO CHAHA THA,
WOH ZAAT BHI US KO YAD NAHIN,
JAB SHAB KI BIJLI CHAMKI THI,
AUR BADAL TOT K BARSA THA,
HUM DONO JIS MEIN BHEGAY THE,
WOH BARSAT BHI US KO YAD NAHI,
WOH SAHIL DARYA PHOOL HAWA,
WOH WADA SATH NIBHANAY KA,
AUR SHAB BHAR "CHAND" KO DEKHA THA,
WOH RAAT BHI US KO YAD NAHIN,
WOH KEHTI THI MAIN SUNTA THA,
WOH KEHTA THA WOH SUNTI THI,
UN LAKHON BATON MEIN KOI EK BAAT BHI US KO YAAD NAHIN

**Tani** Tue Aug 11, 2009 11:17 pm

Tani

Tani: Mensajes : 2023
Fecha de inscripción : 2009-07-12

Post n°6

Meri taqdeer say pooch

Tani Tue Aug 11, 2009 11:17 pm

Meri taqdeer say pooch meri kismat ka faisla
meri muskrahat pay na ja mere dard ko talash kar,

Meri ankhon say pooch mere intizar ki inteha,
mere etmenan pe na ja Mere sabar ko talash kar

Mere doston se pooch meri chahat ka alam,
meri surat pe na ja meri seerat ko talash kar

Jo mil jayen tujhay mery sawalat k jawabat
to phir ik zara sa kam kr Mujhay Khud Main Talash Kar

**Tani** Tue Aug 11, 2009 11:38 pm

Tani

Tani: Mensajes : 2023
Fecha de inscripción : 2009-07-12

Post n°7

Re: Urdu Poetry

Tani Tue Aug 11, 2009 11:38 pm

Saliqa-e-ishq b mera bary kamal ka tha
k iktayar b dil par ajab misal ka tha
mohabaton may main kaiyal the lab na khulny ke
jawab warna mery pass har sawal ka tha

Urdu Poetry 16710710

**Tani** Tue Aug 11, 2009 11:42 pm

Tani

Tani: Mensajes : 2023
Fecha de inscripción : 2009-07-12

Post n°8

Re: Urdu Poetry

Tani Tue Aug 11, 2009 11:42 pm

Zikr-e-shab-e-feeraaq se wehshat usse bhi thi
Meri tarah kisi se mohabbat usse bhi thi
Mujh ko bhi shauq tha naye chehron ke deed ka
Raastya badal ke chalne ki aadat usse bhi thi
Sunata tha wo bhi sab ko puraani kahaniyan
Taza rafaqaton ki zaroorat usse bhi thi
Mujh se bichhad ke shehar mein ghul mil gaya wo shaks
Halaan ke shehar bhar se raqaabat usse bhi thi
Wo mujhse badh ke zabt ka aadi tha jee gaya
Warna har ek saans qayaamat usse bhi thi.
Aaye dil na jaan khud ko nakaam ke bad-zauq
Wo mana nahi par mujhse mohabbat usse bhi thi

Urdu Poetry 35874110

Sponsored content

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30

Zinda Pak

Search

Latest topics

Navigation

Forum

Affiliates

September 2024

Keywords

Log in

Urdu Poetry

Urdu Poetry

Re: Urdu Poetry

Re: Urdu Poetry

Re: Urdu Poetry

Re: Urdu Poetry

Meri taqdeer say pooch

Re: Urdu Poetry

Re: Urdu Poetry

Re: Urdu Poetry

Similar topics

Similar topics

Search Query

Display results as : Posts Topics
Advanced Search